أنا والشعر بقلم الشاعر الدكتور. محمد ضباشه //مصر
أنا والشِّعْر
محمد ضباشه
أنا و الشِّعْر وعينيكى
وشمعاية يدوب بتشوف
جبال الخوف على سطري
بتتكسر إيمان وكفوف
ما قدره تفتح الشباك
فألقاكي الهوى والنور
يخلي شِعْرِى يتنفس
فأتبسم وانا المقبور
ف ليل يحلم برؤياكي
ياخدنى بضعفي وياكى
ما أموت شاعر وما تكوني
ولو في دنيتي حنطور
يعدي العتمة من يومي
يشيل الوحشة من كومي
وما يعاند جناح عومي
يخلي الساقية ما تلفش
على يميني ولا ديني
وعين الصح ما ترفش
وتاخدني وترميني
كقشه ويا أشعاري
وباقى الحب من داري
فأكتب لك وأنا داري
قانون العشق والإخلاص
ولا انداس وأنا صوتك
وانا عينك وانا القرطاس
مليته من حنان قلبي
وطعمته بجواهر ماس
رسمتك ع الغلاف شمسي
وبستانى وكل الناس
فليه بالهجر بيعاني ؟
وسيباني وشيفاني
بعيش الغربة فى عينيكي
واقول للشعر اسبقنى
مع اللى تاهوا حواليكى
لعل القاكى يوم تصحي
علي شوقي توضيني
واصلى العصر وياكي
وبعد العصر تلاقينى
على نخلة ما بتطاطي
ولا غيرها ملا عيني
فلاقينى انا وشعري
وضمينى لدواوينك
وخلى القطر ما يفوتني
على محطة ملايينك
بنسقي الصبر م الصبار
ونرسم شمس مالها نهار
وليل قاسي بيخنقنا
ويسألني أنا فينك ؟؟؟
من ديوان رسالة بعلم الوصول 2022
تعليقات
إرسال تعليق