انا والليل واوهامي د.محمد ضباشه عميد اﻻعمال الكاملة والمؤرخ الموسوعي المعاصر
أنا والليل وأوهامي
محمد ضباشه
سنين والغربة نساية
بتسقي لهفة الملهوف
حنين طارح بلا نهاية
مرار صبار تملى يطوف
يغذي الوحدة جوايا
فأهرب من ليالى الخوف
وأحضن فيكى أحلامي
ولملم باقى أيامي
وأعجنها فتخمر ريش
أرفرف بيه على عيونك
وانده لك فما ترديش
ولا حسانى جواكي
حصان بارك من التلطيش
ولا رجعلك بصيص الشوق
عيون ورموشها ضلاية
تاخدني ع الشفاه قبلة
تعيد البسمة لمسايا
فأسهر لك أنا والليل
وكام شمعة فى مرآيا
ننادي قلبك المسجون
وراء العتمة يا حكاية
كتبها قلبى بالمقلوب
صحيت الصبح ما معايا
نفس جنبى يدفينى
وانام واصحى بلا غاية
فهاتى الشمس من خدك
على قلبي تصحيني
أهدهد باللقا قلبك
وأفرد لك رموش عيني
بساط أخضر يليق بيكي
وفى نهايته تلاقينى
دراع بالقوة يفتل لك
نهار صابح يوضينى
ف اصلى العصر وياكى
يزيح الغمة وأسايا
تعليقات
إرسال تعليق